Auteur

Extrait de Hisses, hâlettes… è gros sabots

Afin du m’ mète an-apétit,
Avant d’ soupér, dj’ ètous sôrti
Fâre in p’tit tou èt sé m’ prèsséy,
Du coté d’ la fèrme dj’ â passéy.
Faut dère quu dj’ ètous bin teumèy,
N’y avout eune vatche qui fayout l’ vé.
Èt dj’â bayi in p’tit côp d’ mé.

Quand l’afére è ètu tèrminèy,
Dès la mâjan an z-è rètréy
Pou boir’ la goute… Falout fétéy
La naissance d’in bé cul d’ poulé.
S’ la cuisinière, su in feû d’ bos,
Eune boune ratatouye mijotout.
La fèrmièr’ avu sa quie d’pot,
Pentchîte s’ la marmite, la touyout.
À soupér èle m’è invitèy.
Sés façan dj’ m’avous installèy.
Èt c’èst seul’mat quu dj’â r’marqéy
Qu’ èle avout eune grande goute an néz.

Dju n’ seû m’ nareuye, dj’ â fât la guére
Èt dj’ â counu tout plé d’ miséres,
Mé i faut bin l’dère, cent varas,
Dj’ ètous dègoutéy d’ cète goute là.
Èle djibaudout, èle pèdrouyout,
Èt quand la brave feume runiflout,
Èle rumantout… peû r’dèvalout.
‘Ousqu’ èle va tchieur ?’ quu dju m’ dijous,
‘Pourvu qu’ça n’sout m’ dès la marmite,
Ca dès ç’ cas là, mi dj’ pré la fuite’.

Pou ça, la goute èst bin teuméy,
Ca à tére èle è arrivéy.
Èt dj’ â ètu bin souladgi
Quand la fèrmière s’ è eû moutchi
A trampètant dès in moutchoi
Tout routche avu in tâs d’ gros pois.
Après, c’èst sé arrièr’ penséye
Quu dj’ â médgi trois-assiètéyes.
Co d’in pô qu’ dju n’savous m’ leuvèy
Quand-il-è ètu l’heure d’ a ralèy.

A rètrant, v’la bin quu m’ man
V’lout m’fâre eune am’lète aux quèrtans.
Mèrci ditche, dj’â eû la goute,
Ç’ èst asséy pou aneû sé doute.
Èle n’ è m’ comprin, il-ètout tar’d,
Èt dju m’ â fât trétéy d’ soifar’d,
Du roulî èt méme du trénâr’d…
Èt patata, èt patati…
Aradgi, dj’ â ètu coutchi.
In mot, dju n’ arous seû l’ placéy,
I valout mieu èvacuéy.

Mé c’ èst à v’ dègoutèy bon sang,
D’èssayi d’ rende sèrvice aux dgens.

.