Auteur

Mès bons sossons djè r’vins d’ la noce
Dè la Fifine du nonon Djean
An m’ è bayi in tchaudé d’ blosses
Pou raportér à mès-afants
Si v’ l’ avins veû v’ dèrins qué pâte
Qué bèlles djaunes blosses, qué bé dju
Pou chûr an n’ è m’ prin lès ramâts
An-è bin min cinq’ ou chij’ ûs
Pou chûr an n’ è m’ prin les ramâts
An-è bin min cinq’ ou chij’ ûs

À z-a rallant la tante Jeannètte
Mu dit inlà : « Ecoûte, Constant »
Dj’ a min l’ tchaudé sû ’ne vîe volète
Ratortiyie dà in linçû blanc
In bé tchaudé, dès bèlles grosses blosses
Bin queûtes avu leû gros neûyans
Èlles v’nant du vî cousin Bobosse
Cudûtes dà s’ méche du tchû haut
Èlles v’nant du vî cousin Bobosse
Cudûtes dà s’ méche du tchû haut

À la noir’ neû nous vulà r’vouye
Tchèquin avu s’ pitit magot
La tante Mèlie s’ plédout d’ sès douyes
Èt l’ nonon Jules puout la goute
La Rosalîe chinout sa bosse
T’t a t’nant la moitî d’ in rouyot
Èt mi dj’ sârous èm’ tchaudé d’blosses
T’t a triplant coume in djône gayot
Èt mi dj’ sârous èm’ tchaudé d’blosses
T’t a triplant coume in djône gayot

A z’arivant à la Cambuse
Dju nous tapans dà deux gabelous
Lu pu djône dit : « J’crois qu’on s’amuse »
Pardjè, qu dj’ dis, an z’ èst fin sôs
Ici faudra sans manigance
Dèfirnawér tous vos paquèts
Avant d’ quitter la terre de France
On va vous rabate èl caquèt
Avant d’ quitter la terre de France
On va vous rabate èl caquèt

L’ mâte gabelou hutche sa gârce du feume
Coume si dj’ atins contrebandjès
Èlle goûte èt dit : « ce sont dès peumes
Avec des pierres dans la moitié »
Pardon, excuse, espèce de rosse
C’ que vous mangez comme une goulafe
De mon tchaudé ce sont lès blosses
Vous mériteriez une berlafe
De mon tchaudé ce sont lès blosses
Vous mériteriez une bèrlafe

Devant une telle rouspétance
L’ gabelou m’ è prin èm’ bé tchaudé
Èt dj’ l’ ô qui dit : « tunéz Constance,
Wardéz l’ dan pou not’ marèdèye »
Èt c’ èst inlà qu’ ruv’nant d’ la noce
Dè la Fifine du nonon Djean
An m’ è gaulèye in tchaudé d’ blosses
Què dj’ raportous pou mès-afants
An m’ è gaulèye in tchaudé d’ blosses
In bé tchaudé du Saint-Laurent